SUWASA: Yasogeza huduma ya maji kwa Wananchi wa Mtaa wa Mungu Maji

[Roving Journalist]

Mamlaka ya Majisafi na Usafi wa Mazingira Singida (SUWASA) kupitia mradi wa Uboreshaji wa huduma imefanikiwa kuwasogezea maji safi na salama wananchi wa mtaa wa Mungu Maji uliopo Manispaa ya Singida, hatua inayolenga kumtua mama ndoo kichwani.

Mradi huo uliofadhiliwa na SUWASA na kusimamiwa na Fundi Sanifu Ujenzi, Mkami Magesa, umehusisha ulazaji wa mabomba yenye kipenyo cha inchi 2 kwa urefu wa mita 300. Kazi zilizofanyika katika mradi huu ni pamoja na ununuzi wa mabomba, uchimbaji wa mitaro, ununuzi wa viungio, ujenzi wa chemba, na uwekaji wa alama za njia za mabomba ya maji. Jumla ya gharama ya mradi ilifikia shilingi 2,730,000.

Magesa, ameelezea mafanikio ya mradi na umuhimu wake kwa jamii, akisisitiza kuwa huduma ya maji ni moja ya vipaumbele vya serikali kwa maendeleo ya wananchi.

Diwani wa Kata ya Mungumaji, Mhe. Hassan Shaban Mkata, ameishukuru Serikali kwa kuendelea kuboresha huduma ya maji hapa nchini, hatua iliyosaidia upatikanaji wa huduma hiyo katika maeneo mengi, ikiwemo kata yake ya Mungumaji.

Wakazi wa eneo hilo, Ibrahim Haji na John Joseph, walieleza furaha yao kuhusu upatikanaji wa maji safi, wakisema kuwa huduma hiyo itarahisisha shughuli za kila siku na kuokoa muda mwingi ambao walikuwa wanatumia kutafuta maji kutoka maeneo ya mbali.

Imetolewa na
Neema Lulandala-Kaimu Mkuu wa Kitengo cha Mawasiliano na Uhusiano wa Umma-SUWASA​