Nchi yenye hofu ya Wananchi wake kusema ukweli si nchi bali ni gereza. Na Tanzania ya sasa inazidi kugeuka kuwa hivyo

[UHURUWANGU]

“Udhibiti wa Uhuru wa Maoni na Habari”— ambayo ni nguzo muhimu ya demokrasia na ukombozi wa kifikra.

Nchi yenye hofu ya Wananchi wake kusema ukweli si nchi bali ni GEREZA. Na Tanzania ya sasa inazidi kugeuka kuwa hivyo: mahali ambapo kusema ni HATARI, na kunyamaza ni SALAMA.

Mitandao ya kijamii na vyombo vya habari vilipaswa kuwa jukwaa la mijadala huru, maoni tofauti, na hoja za maana—lakini sasa vimekuwa minyororo ya kifikra.

Kuna hofu isiyo rasmi lakini kali: "Ukisema vibaya kuhusu uongozi, unaweza kupotea, kufuatwa, au kushitakiwa." Hii siyo Tanzania tuliyoahidiwa baada ya uhuru. Hii ni Tanzania inayozima sauti badala ya kusikia kilio.


Udhibiti Upo Wazi—Na Madhara Yake Ni Makubwa

1. Waandishi wa habari wanatishwa, kufungwa au kufungiwa vyombo vyao.

Si kwa kusema uongo—bali kwa kusema ukweli usiotakiwa na watawala.

2. Wananchi wanajiziba midomo, si kwa heshima bali kwa hofu.

Hofu ya kutajwa, kufuatwa, au kupotezwa.

3. Mitandao inafuatiliwa kama uwanja wa vita badala ya jukwaa la wananchi.

Polisi wa mtandaoni wanavizia kila aliye na maoni huru, si kila aliye na uovu.

4. Sheria za mawasiliano na mitandao zimetungwa si kulinda watu, bali kuziba sauti zao.

Adhabu ni kali kwa kusema, lakini si kwa kutenda uovu.


Nani Anafaidika na Kimya chetu?

Ukimya wa wananchi ni chakula cha watawala waovu.

Ukimya wa vyombo vya habari ni ushahidi wa kufa kwa haki.

Ukimya wa mitandao ni ushindi wa wanyanyasaji dhidi ya wanyonge.


Lakini Tusisahau: Uhuru wa Kusema ni Kiini cha Mabadiliko

Kila harakati kubwa duniani ilianza kwa mtu kusema ukweli bila kuogopa.

Uhuru wa Mandela ulianzia kwa kusema "Sisi si wa pili kwa mtu yeyote."

Mapinduzi ya Ufaransa yalianza kwa wananchi kusema “Tumekataa kunyanyaswa.”

Hata Yesu hakuogopa kusema mbele ya watawala — akajulikana kwa kusema ukweli.

Sisi Watanzania tunahitaji kusema. Kwa sauti moja. Kwa UTHUBUTU. Kwa UZALENDO.


Hatuwezi Kujenga Taifa kwa Kunyamazisha Raia Wake.

Serikali isiyo tayari kusikiliza maoni ni serikali iliyo tayari kuharibu kizazi.

Vyombo vya habari vinavyolazimishwa kuwa vinyamavu vinakuwa makaburi ya ukweli.

Mitandao inayowindwa na dola inageuka kuwa mtego wa hofu, si silaha ya UHURU.


Tukubali: Uhuru wa Maoni ni Kinga ya Taifa

Bila UHURU wa kusema:

• Ufisadi unaota mizizi.
• Viongozi hawajibiki.
• Wananchi hawajui haki zao.
• Demokrasia inabaki kuwa neno lisilo na maana.

Hatuhitaji HOFU —tunahitaji UHURU.

Hatuhitaji sifa za UONGO —tunahitaji UKWELI.

Hatuhitaji mitandao ya KUTISHIANA —tunataka mitandao ya KUELIMISHANA.

 

[Tate Mkuu]

Ninachofahamu utawala uliochokwa na wananchi hata ufanye nini hauwezi kudumu. Utaanguka tu katika wakati sahihi.

 

[UHURUWANGU]

Ninachofahamu utawala uliochokwa na wananchi hata ufanye nini hauwezi kudumu. Utaanguka tu katika wakati sahihi.

Kweli kabisa utawala uliopo hauna BARAKA za Wananchi kwa sababu haukuingia madarakani kupitia sanduku la mpiga kura.

Muda huo ni pale mpigakura atadai arudishiwe haki yake ya kuwachagua wawakilishi wake na hapo hakuna atakayeweza kuzuia NGUVU YA UMA

Watanzania wanastahili Katiba Mpya na Tume Huru ya Uchaguzi ili kuhakikisha haki na usawa kwa vyama vyote.

🔥 Hakuna Mabadiliko? Hakuna Uchaguzi! 🔥