SI KWELI Mbu akimng'ata binadamu, yeye hufa hapo hapo

Kwa mujibu wa utafiti uliochapishwa katika tovuti ya taifa ya dawa ya nchini Marekani kuna aina zaidi ya 3,500 za mbu kutoka katika mabara tofauti isipokuwa Antarctica. Katika aina zote hizo za mbu ni aina chache tu za mbu ambao wanaweza kuambukiza magonjwa kwa bidanadamu ikiwemo Malaria.

Mbu jike anaweza kuishi hadi miezi mitatu na zaidi kulingana na aina husika ya mbu na anaweza kutaga hadi mayai 300, mbu hula sukari inayopatikana katika maua. Mbu jike hutumia mate yake anapokuwa ananyonya damu ili kuitenga damu na maji na kusaidia damu hiyo kutoganda anapokuwa anafanya zoezi hilo. Mate ambayo hupelekea muwasho kwa aliyen’gatwa.

Mbu jike wengi hujamiiana mara moja tu kwenye maisha yao yote na kisha huzitunza mbegu za kiume ambazo zitatutumika kwa wakati wote wa upevushaji wa mayai atakayoyazalisha. Mbu jike na mbu dume wanapokutana mbu jike hupokea protini nyingi kutoka kwa mbu dume hali inayompelekea kutafuta damu kwa ajili ya kurutubisha mayai yake.

Ukweli upoje?
JamiiCheck imepitia tafiti na machapisho mbalimbali ili kubaini uhalisi kuhusu hoja hiyo na kubaini kuwa hoja hiyo si ya ukweli. JamiiCheck imebaini kuwa ni mbu jike pekee ndiye anayemuuma binadamu na wanyama wengine ili aweze kupata damu itakayomuwezesha kuyapa rutuba mayai yake kwa kuyaongezea protini na asidi za amino.

Mbu jike ili aweze kukamilisha mchakato wake wa utagaji mayai huitaji damu kutoka kwa binadamu ama wanyama wengine hivyo si kweli kwamba akimuuma binadamu hufa. Mbu jike hafi mara baada ya kunyonya damu kwani mbu jike huitaji damu mara kwa mara ili aweze kurutubisha mayai yake. Kwa mujibu wa orkin.com kama mbu jike angekuwa anakufa mara tu baada ya kumng’ata binadamu basi huenda mbu wasingekuwepo ama wangekuwa wamebakia kwa kiwango kidogo sana. Ingawa pia si mbu jike wote hutegemea damu kwa ajili ya ya mchakato wa utagaji.