Wakati tupo katika mwanzo wa mwaka mpya 2025, kuna haja muhimu ya kutazama uhusiano kati ya China na Marekani, ambao ni moja kati ya uhusiano muhimu sana wa pande mbili duniani kwa sasa. Kwa ujumla, mwaka jana uhusiano huo umeendelea kuwa wa utulivu. Nchi hizi mbili zimefuata mwongozo wa diplomasia ya wakuu wa nchi na kujikita katika kutekeleza Azimio la San Fransisco, kufanya duru mbili za mawasiliano ya kimkakati na mikutano mitano ya Kundi la Masuala ya Kifedha na Kundi la Masuala ya Kiuchumi.
Pande hizo mbili pia zimeongeza ushirikiano wa kivitendo katika maeneo kama ya kupambana na dawa za kulevya, utekelezaji wa sheria na mabadiliko ya tabianchi, kuongeza muda wa makubaliano ya sayansi na teknolojia, na kupitisha maazimio ya kila upande kuhusu akili mnemba katika Mkutano wa Baraza Kuu la Umoja wa Mataifa. Pia, karibu vijana 15,000 kutoka Marekani wametembelea China kupitia pendekezo la “50,000 katika miaka mitano.”
Ingawa kuna pande hasi zinazojitahidi kuharibu uhusiano kati ya nchi hizo mbili, maendeleo haya yamehakikisha kasi ya ushirikiano wa China na Marekani, na yamepongezwa sana na Wachina na Wamarekani katika sekta zote, na pia jamii ya kimataifa kwa ujumla.
Kwa mtazamo wa historia ya kibinadamu, hakuna nchi mbili zenye nguvu zilizowahi kuwa na mawasiliano ya kina kama China na Marekani. Uhusinao kati ya nchi kubwa zenye nguvu si lazima uwe na hatma ya uhasama, kama inavyoonyeshwa na baadhi ya wasomi wa nchi za Magharibi. Hatma ya uhusiano wa China na Marekani haipaswi kuwa sawa na mifano iliyopita ya uhusiano ya nchi kubwa zenye nguvu, badala yake, inapaswa kujikita katika kutafiti njia sahihi kwa nchi hizo mbili kuishi pamoja kwa masikilizano.
Uzoefu wa uhusiano wa kidiplomasia kati ya china na Marekani tangu kuanzishwa kwa uhusiano rasmi unaonyesha kuwa, kama nchi mbili zikishirikiana kama wenzi, kutafuta msimamo wa pamoja wakati zikidumisha tofauti, uhusiano wa China na Marekani unaweza kupata maendeleo makubwa. Hata hivyo, kama kila nchi ikiona nchi nyingine ni mpinzani na kuwa na ushindani usio mzuri, uhusiano huo utakabiliwa na vizuizi na hata kurudi nyuma badala ya kuendelea mbele. Ingawa miaka 45 iliyopita imeshuhudia kupanda na kushuka kwa uhusiano kati ya nchi hizo mbili, utulivu wa jumla na maendeleo ya uhusiano vinatumika kama ushuhuda wa kanuni hii.
Mwaka huu mpya wa 2025, Marekani itakuwa na serikali mpya. Rais mteule Donald Trump hivi karibuni alisema kuwa China na Marekani zinaweza kufanya kazi pamoja kutoa suluhisho la matatizo yote yanayoikabili dunia. Inapaswa kukumbuka kuwa Trump anatambua fursa kubwa ya ushirikiano kati ya China na Marekani, lakini ‘ushirikiano’ huu unapaswa kunufaisha pande zote mbili kwa pamoja. Kwa mfano, ushirikiano na kunufaishana vinaonekana katika masuala mengi, lakini kama Marekani inatarajia kusuluhisha tatizo la fentanyl kwa mkono mmoja huku wakati huohuo ikiweka vikwazo visivyoeleweka kwa kampuni za China kwa mkono mwingine, ikitaka China kununua bidhaa za Marekani huku ikiingilia kati ushirikiano wa kisayansi, ama inaitaka China kununua hisa za Hazina ya Marekani wakati ikifanya biashara ya silaha na Taiwan, vitendo hivi hakika havitakubalika. Katika maingiliano kati ya China na Marekani, hakuna upande unaoweza kurekebisha mwingine kutokana na matakwa yake yenyewe. Hatimaye, kuheshimiana, kuishi pamoja kwa masilikizano, na ushirikiano wa kunufaishana ni kanuni ambazo zinapaswa kudumishwa katika uhusiano kati ya China na Marekani.
Kutoka nyanja za jadi kama biashara na kilimo mpaka maeneo yanayoibuka kama mabadiliko ya tabianchi na akili mnemba, kuna maeneo mapana ya maslahi ya pamoja na ushirikiano wa kunufaishana kati ya China na Marekani. Nchi zote mbili zinapaswa kuwajibika kufuatia historia, watu, na dunia, kuongeza orodha ya ushirikiano, kutimiza ushirikiano wa kunufaishana, na kuboresha maendeleo ya uhusiano wa pande mbili katika njia tulivu, yenye afya, na endelevu.
